આ કેલેન્ડરમાં પણ એ જ છે,
સીતામૈયા જમાડી રહી છે અને
બ્રહ્મા, વિષ્ણુ, મહેશ બાળસ્વરૂપે
મારાં મૃત બાળકો જેવાં,
જેમને મેં દફનાવી દીધાં છે, મારા પતિના શરીરમાં,
એ બાળકો ભૂત થઈને જાગે છે,
રોજ નવું નવું ખાવાનું માગે છે,
ઘરમાંનું બધું અનાજ ખૂટી જાય ત્યાં સુધી ખાયા કરે છે,
કોઈ આશીર્વાદ નથી આપતા પણ
મારી જ યોનિમાંથી ફરી ફરીને જન્મ લેવા માગે છે.
જન્મે છે, જમે છે અને મરી જાય છે.
મારું રસોડું રોજ એમને બત્રીસ પકવાન પીરસતું રહે છે,
મારો બેડરૂમ સ્મશાનઘાટ જેવો થઈ ગયો છે.
ક્યારેક ભડકે બળતી ચિતાઓ
ક્યારેક શાંત દફન.
મારો પતિ રોજ અસ્થિફૂલ તારવતો રહે છે,
ક્બર પર ચડાવવા ફૂલો વીણતો રહે છે.
મારાં બાળકો ભટકતો આત્મા છે.
રોજ મારા પતિના શરીરમાં વીર્ય બનીને આવે છે
અને મારાં સ્તનોમાં દૂધ બનીને.
❏