સાગરના સંતની વાણીને
એકીશ્વાસે સાંભળી રહેલાં
છીપલાંને થયું,
મારી અંદર આ મોતી?
કરચલો કલ્પને ચડ્યો,
ક્યારેક તો એવો પવન પણ
આવી જતો હશે કે જ્યારે
શંખ બધા આપોઆપ જ ફૂંકાવા માંડે!
માછલી એની ટચૂકડી પુચ્છ ઉછાળી
ખડકછોડ સામે દાંતિયાં કરે,
અને નાનકડી સફેદ કાંકરીઓ
સઢના પડછાયે સપનાં જુએ.
પછી, વહાણોની વિદાય વસમી લાગે.
એવે વખતે,
હોડીના તળિયે પડેલું બાકોરું જોઈને
માછીમારને થયું,
આ દરિયો,
આખેઆખા આકાશને,
કઈ રીતે સમાવી લે છે?
❏