દલપતરામનાં શ્રેષ્ઠ કાવ્યો/૩૧. શ્રાવણ માસનો દેખાવ
૩૧. શ્રાવણ માસનો દેખાવ
સવૈયો
મેઘતણી ઘનઘોર ઘટા શિર શુદ્ધ જટાજુટ જેમ ઠરે છે,
ઇંદ્રધનુષ્ય ઉદ્યોત અમૂલ્ય ત્રિપુંડ્ક તુલ્ય ટકાવે કરે છે;
ગંગ સહસ્ત્રમુખીસમ શોભિત સર્વ દિશા જલ ઝર્ણ ઝરે છે,
આ ગિરનાર ગિરિ ગુણનો નિધિ શ્રાવણમાં શિવરૂપ ધરે છે.
શોભિત શૈલતણા શુભ ભાગ બધા નભમાંહિ ઊંચે પ્રસર્યા છે,
જાણિયે જીત તથા જરના છબિલા શુભ છોડ ઊંચા ઉછર્યા છે;
કે મુચકંદ અશોકને નોઘણ આદિક કીર્તિના થંભ કર્યા છે,
કે ગુણગાન મહોબતખાન નવાબતણા ધ્વજદંડ ધર્યા છે.