સમગ્ર અરધી સદીની વાચનયાત્રા/રાજેન્દ્ર શાહ/મેહ મીઠી વરસે

From Ekatra Wiki
Revision as of 11:57, 27 September 2022 by KhyatiJoshi (talk | contribs)
Jump to navigation Jump to search

ઝીણી ઝીણી ઝરમર
મેહ મીઠી વરસે.
પાતળા પાલવ તળે
ઉર મારું તરસે.
ઝીલું હું આતુર નેણે,
વ્હાલનાં અબોલ વેણે;
તન રે તનિક લહેરે
હરખાય પરસે.

ઝીણી ઝીણી ઝરમર
મેહ મીઠી વરસે.
કોણ મારું મન બોલે?
બોલે રે ઝિંગુરવા;
ટહુકે ભરાય આભ
વગડા ડુંગરવા.
ડાળે ડાળે પાને પાને
ફલ ફોરે મધુ ગાને,
ચરણ ચંચલ તાને —
બિન રે ઘુંઘરવા.
કોણ મારું મન બોલે?
બોલ રે ઝિંગુરવા.

ઝીણી ઝીણી ઝરમર
મેહ મીઠી વરસે,
ગરવો અમલ ચડે
અમિયલ પરસે.
કાંઠે ન સમાય પૂર,
ઘૂમરાય ઘૂર ઘૂર,
ધરવ ધરે ને ઉર
અદકેરું તરસે.
ઝીણી ઝીણી ઝરમર
મેહ મીઠી વરસે.
[‘સમર્પણ’ પખવાડિક : ૧૯૬૫]