સિગ્નેચર પોયમ્સ/—તો આવ્યાં કને – ચન્દ્રકાન્ત શેઠ

—તો આવ્યાં કને

ચન્દ્રકાન્ત શેઠ

શોધતો હતો ફૂલ ને ફોરમ શોધતી હતી મને,
એકબીજાને શોધતાં ગયાં દૂર, તો આવ્યા કને.

⁠ક્યાંક રે આંબો ટહુક્યો
⁠એની વનમાં મ્હેકી વાત,
⁠કમળ જેવો ખીલતો દિવસ,
⁠પોયણા જેવી રાત.

શોધતો રહ્યો ચાંદ ને રહી ચાંદની શોધી મને,
એકબીજાને શોધતાં ગયાં દૂર, તો આવ્યાં કને.

⁠આંખ મીંચું ત્યાં
⁠જૂઈનું ગાલે અડતું ઝાકળફૂલ,
⁠મનમાં હળુક લ્હેરવા લાગે
⁠વ્યોમથી કિરણ-ઝૂલ.

શોધતો જેની પગલી એનો મારગ શોધે મને,
એકબીજાને શોધતાં ગયાં દૂર, તો આવ્યાં કને.