કાવ્ય-આચમન શ્રેણી – મકરન્દ દવે/૨૧. ફોરમ
Revision as of 11:32, 10 November 2022 by KhyatiJoshi (talk | contribs)
૨૧. ફોરમ
ફૂલ તો એની
ફોરમ ઢાળી રાજી.
વાયરો ક્યાં જઈ ગંધ વખાણે,
ફૂલ તો એનું કાંઈ ન જાણે,
ભમરા પૂછે ભેદ તો લળી
મૂગું મરતું લાજી : ફૂલo
એક ખૂણે આ આયખું નાનું,
કેવું વીતી જાય મજાનું!
કોઈનું નહીં ફરિયાદી ને
કોઈનું નહીં કાજી : ફૂલo
એનું નિજના રંગમાં રાતું.
ખુશ્બૂભર્યું એકલું ખાતું,
મસળી નાખે કોઈ તો સામે
મહેક દે તાજી તાજી!
ફૂલ તો એની
ફોરમ ઢાળી રાજી.
૧૫-૧૨-’૫૮ (સૂરજમુખી, ૧૯૬૧, પૃ. ૬૫)