ગુજરાતી ગઝલસંપદા/ શિવજી રૂખડા
Revision as of 14:27, 8 January 2023 by Kamalthobhani (talk | contribs) (Created page with "{{SetTitle}} {{Heading| શિવજી રૂખડા |}} <poem> આંગણામાં આપણે ભૂલા પડ્યા, આપણામાં આપણે ભૂલા પડ્યા.<br> એક હળવી વાતને મોટી કરી હુંપણામાં આપણે ભૂલા પડ્યા.<br> આમ તો ત્યાં એકલા ફરતાં હતાં, પણ ઘણામાં આપણે ભૂલા પડ્...")
શિવજી રૂખડા
આંગણામાં આપણે ભૂલા પડ્યા,
આપણામાં આપણે ભૂલા પડ્યા.
એક હળવી વાતને મોટી કરી
હુંપણામાં આપણે ભૂલા પડ્યા.
આમ તો ત્યાં એકલા ફરતાં હતાં,
પણ ઘણામાં આપણે ભૂલા પડ્યા.
રોજ દિવસ ધારવામાં જાય છે,
ધારણામાં આપણે ભૂલા પડ્યા.
તાર સીધા હોય તો ચાદર બને,
તાંતણામાં આપણે ભૂલા પડ્યા.
દ્વાર ઝાઝાની હવેલી આપણી,
બારણાંમાં આપણે ભૂલા પડ્યા.