કંદરા/રૅઝર્વેશન
કલાકો સુધી બસમાં શાંતિથી મુસાફરી કરવી
સાચે જ કંટાળાજનક હોય છે.
રસ્તાની બંને બાજુએ વૃક્ષો,
(લીમડો કે પીપળો કે વડ-એવું કંઈ ઓળખાય નહીં)
બસ, વૃક્ષો આંખ સામેથી પસાર થતાં રહે.
ક્ચકડાની ફિલ્મ જોતો છોકરો
હજી તો ‘દિલ્હી કા તાજ' નિરાંતે જુએ
એ પહેલાં જ દશ્ય બદલાઈ જાય,
એવી એકધારી ઝડપથી બસ દોડી રહી છે.
કંઈક તો બનવું જ જોઈએ.
આ બસ રોકાવી જ જોઈએ.
ડ્રાઈવર સ્ટીયરીંગ પરથી કાબૂ ગુમાવી બેસે.
કોઈ ગમખ્વાર અકસ્માત થાય.
હું અપંગ થઈ જઉં, મારો પોતાનો ભાર અનુભવી શકું.
અને વ્હીલેચરમાં બેસીને શાંતિથી,
બેઉ હાથથી પૈડાં ફેરવતી આ સુંદર રસ્તા પર આગળ વધું
કે પછી હું મરી જ જઉં અને ઘેર શોક પાળવામાં આવે.
કે પછી એવો મૂઢ માર વાગે કે બધા જ મુસાફરો
પોતાની યાદદાસ્ત ભૂલી જાય.
અને ડ્રાઈવર બસને હંકારી જાય
એની કોઈ મનપસંદ જગ્યાએ.
કે પછી એવું બને કે બસ અચાનક ઊંધી વળી જાય.
મુસાફરો બધા શીંગ, ચણા ને કુલ્ફી ખાતાં મરી જાય.
એકમાત્ર હું જ બહાર આવું, સંકટ સમયની બારીમાંથી,
એ બધાનું આયુષ્ય ચોરી લઈને.
અને પછી હું જીવું એ લોકોનાં બાકી રહેલાં જીવન પણ.
કે પછી અચાનક બસનો પગ લપસી પડે
આ નીચેની ખીણમાં.
ને કાયમ એક રહસ્ય જ રહી જાય
કે હું જીવતી હોઈશ કે મરી ગઈ હોઈશ?
પણ કંઈ જ બનતું નથી
આ સામેથી આવતો ટ્રકવાળો
મને હતું કે હમણાં અથડાશે
પણ એ ય બહુ સિફતથી પસાર થઈ ગયો.
ફરી એ જ રસ્તાની બંને બાજુએ વૃક્ષો.
મારા જ ગામનાં તદ્દન અપરિચિત.
કંડક્ટરે દોરી ખેંચી ઘંટી વગાડી.
કાબેલ ડ્રાઈવર બસનું બોર્ડ ઊંધું વાળી
કૂદકો મારી ઊતરી ગયો રિપૉર્ટ કરવા, સહીસલામત.
કંડક્ટર એનું પરચૂરણ ગણતો ચાલવા માંડ્યો, હિસાબ
લખવા.
હું પણ ચાલવા માંડી ઘર તરફ.
ઘરે બધાએ વ્હાલથી આવકારી, જમાડી.
વજનકાંટા પર ઊભી રાખીને વજન કર્યું.
‘બેટા, તારે હજી વધુ ખાવું જોઈએ.'
જો કે, વ્હીલચેર સાથેના મારા વજનની એમને કયાંથી
ખબર હોય?
હું મારી ન ભૂલાયેલી યાદદાસ્ત લઈને સૂઈ ગઈ.
સવારે મમ્મીએ બસની ટિકિટ ફાડીને ફેંકી દીધી કચરામાં.
થોડા દિવસ પછી,
એ જ ટિકિટનું ફરીથી રૅઝર્વેશન.
❏