કાવ્ય-આચમન શ્રેણી – મકરન્દ દવે/૪૧. ધાનનું ખેતર

From Ekatra Wiki
Jump to navigation Jump to search
૪૧. ધાનનું ખેતર


કાળા ભમ્મર મેઘની નીચે
લીલું મારું ધાનનું ખેતર.

ઝીણી ધારે વરસ્યાં વારિ,
વ્હાલની કરી વાવણી સારી,
કઠિન ભારે બંધ વિદારી,
હળની તીણી અણીએ જાગ્યા
ચાસે ચાસે હાસ થરેથર. —

વાયરે ગાતા મોલ આ નમે,
માથે કાચો તડકો રમે,
જીવને મારા જીવથી ગમે,
કોઈ તો જુઓ નેહનો જાદુ!
નેહથી બધું થાય નવેસર. —

કાળાં વાદળ કાલ તો જાશે,
લીલા મોલ આ સોનલા થાશે,
દાણે દાણે દૂધ ભરાશે,
સાદ પાડીને નોતરું સીમે
આવો, આવો, લાવર-તેતર! —

કાળા ભમ્મર મેઘની નીચે
લીલું મારું ધાનનું ખેતર.

૧-૮-’૬૭ (સંગતિ, પૃ. ૯૭)