કાવ્ય-આચમન શ્રેણી – રઘુવીર ચૌધરી/વાવેતર

૩૪. વાવેતર

ખેતરની કેડીએ પંખીનાં પગલાંમાં
⁠ દોરીને શૈશવના ચાસ,
આંબા ને લીંબડાની ટોચે ચઢીને અમે
⁠ આંખોમાં વાવ્યું આકાશ.

ગાડામાં બેસીને ગામતરે ગ્યા’તા ને
⁠ જોયા’તા વહાલાના વાસ,
દોડી ગયેલ એક કન્યાના ઝાંઝરના
⁠ ઝણકારે થ્યા’તા ઉદાસ.

પાછા વળાય એમ નો’તું ને યાદ હજી
⁠ કાચું ને લીલુંછમ ઘાસ
આંગણાની લાગણીઓ ઓછી પડતી’તી કે
⁠ સીંચાયા આંસુથી શ્વાસ.

પાલવમાં પોઢંતાં જાગે ત્યાં
⁠ હાલરડે ઊઘડતો લયનો ઉજાસ,
વાણીના અર્થો શા ઓઘલવા લાગ્યા ને
⁠ બાજરિયાં ડોલે ચોપાસ.

પાદરનાં પંખીનું ગાન નવું સાંભળવા
⁠ ઊભો છું શેઢે લઈ આશ.
૭-૧૦-૦૧

⁠(પાદરનાં પંખી, ૨૯)