કાવ્ય-આચમન શ્રેણી – સુરેશ દલાલ/હું તો લખતી ને

૨૧. હું તો લખતી ને

હું તો લખતી ને કોરો રહે કાગળ
કે પંથ મારો આગળ જતો ને રહું પાછળ!
અહીંના આકાશમહીં ત્યાંનાં કોઈ વાદળાં

⁠રે, આવી આવીને જાય વરસી;
હરિયાળી આમ ભલે ખીલી ને તોય મને
⁠લાગે કે આજ ધરા તરસી.

એકેએક ઘૂંટે ઘૂંટાયો દાવાનળ;
કે પંથ મારો આગળ જતો ને રહું પાછળ!

પંથ મારો ચાલે ને તોય મને લાગે
કે અહીંયાં કોઈ પંથ નથી ક્યાંય;
અહીંનો સૂનકાર બધો આવે સમેટવા
એવો ક્યાં ટ્હૌકો રેલાય?

મૌનમાં ગળતો રહે છે હિમાચળ
કે પંથ મારો આગળ જતો ને રહું પાછળ!

૧૯૬૯⁠(કાવ્યસૃષ્ટિ, પૃ. ૧૦૧)