ચૂંદડી ભાગ 1/55.આવે આવે રે વાસુદેવનો નંદ (તોરણે આવતાં)

55.

કોને જોઈ રહી? કોણ આવે છે એ? એની આંખોમાં આ અજવાળાં શાનાં છવાયાં? સુભગા! તારી જીવન-પૂર્ણિમાનો ચંદ્રમા આવે છે :

આવે આવે રે વાસુદેવનો નંદ

પૂનમ કેરો ચંદ

દીવા કેરી જ્યોત

વીવા’ કેરી વરધ

કે વર આવ્યે અંજવાળાં રે!

તું મોકલ વેવાઈ વાટકડો,

તારે તોરણ આવે છે લાડકડો. — આવે આવે રે.

તું મોકલ વેવાઈ સોપારી,

તારે તોરણે આવે છે વેપારી. — આવે આવે રે.

તું મોકલ વેવાઈ હાથીડા,

બેસી આવે વરરાજાના સાથીડા. — આવે આવે રે.

તું મોકલ વેવાઈ પાલખડી,

બેસી આવે વરરાજાની મા લખમી. — આવે આવે રે.

તું મોકલ વેવાઈ વેલડિયું,

બેસી આવે વરરાજાની બેનડિયું

આવે આવે રે વાસુદેવનો નંદ

પૂનમ કેરો ચંદ

દીવા કેરી જ્યોત

વીવા’ કેરી વરધ

કે વર આવ્યે અંજવાળાં રે!