ચૂંદડી ભાગ 1/85.ત્રાંબાકુંડી છે નગર સોહામણી (જાન વળતાં)

85

ત્રાંબાકુંડી તે નગર સોહામણી
માંહે ભરિયેલ ગવરીનાં ઘીય
સાહેબીનો આંબો મોરિયો
મારે કિયા ભાઈનાં વાજિંત્ર વાગિયાં
પેલા વેવાઈનાં પડિયાં નિશાન.          — સાહેલીનો.
મારે કિયા ભાઈને આંગણ આંબલો
મારે કિયા ભાઈને આવે શીળી છાંય.          — સાહેલીનો.
મારે કિયા ભાઈને મેડીએ દીવા બળે
પેલા વેવાઈને અંધારાં ઘોર.          — સાહેલીનો.

મારે કઈ વહુને ચીર ઉપર ચૂંદડી
કઈ વહુને રે મોતી જડ્યો મોડ.          — સાહેલીનો.

મારે કઈ વહુને કાંબી ઉપર કડલાં
કઈ વહુને ઘૂઘરીએ ઘમકાર.          — સાહેલીનો.