તારાપણાના શહેરમાં/સ્વરૂપે અવસ્થાનમ્

સ્વરૂપે અવસ્થાનમ્

દશે દિશાઓ સ્વયમ્ આસપાસ ચાલે છે
શરૂ થયો નથી તોપણ પ્રવાસ ચાલે છે

કશેય પહોંચવાનો ક્યાં પ્રયાસ ચાલે છે?
અહીં ગતિ જ છે વૈભવ વિલાસ ચાલે છે

કોઈનું આવવું, નહિ આવવું, જવું, ન જવું
અમસ્તો આંખમાં ઉઘાડ-વાસ ચાલે છે

દશે દિશામાં સતત એકસામટી જ સફર!
અને હું એ ય ન જાણું… કે શ્વાસ ચાલે છે

અટકવું એ ય ગતિનું જ કોઈ રૂપ હશે!
હું સા...વ સ્થિર છું, મારામાં રાસ ચાલે છે