બાળ કાવ્ય સંપદા/ધમાચકડી
Jump to navigation
Jump to search
ધમાચકડી
લેખક : રમેશ પારેખ
(1940-2006)
એકડો સાવ સળેકડો
ને બગડો ડિલે તગડો
બન્ને બથ્થંબથ્થા બાઝી
કરતા મોટો ઝઘડો
ત્રગડો તાળી પાડે અને
નાચે તા તા થૈ
ચોગડાની ઢીલી ચડ્ડી
સરરર ઊતરી ગૈ
પાંચડો પેંડા ખાતો એની
છગડો તાણે ચોટી
સાતડો છાનોમાનો સૌની
લઈ ગ્યો બધી લખોટી
આઠડાને ધક્કો મારી
નવડો કહેતો : ખસ
એકડે મીંડે દસ વાગ્યા
ત્યાં આવી સ્કૂલની બસ