બાળ કાવ્ય સંપદા/નાના થૈને રે !

નાના થૈને રે !

લેખક : ઝવેરચંદ મેઘાણી
(1894-1947)

નાના થૈને, નાના થૈને, નાના થૈને રે,
બાપુ ! તમે નાના થૈને રે
મારા જેવા નાના થૈને રે,
છાના માના રમવા આવો ! નાના થૈને રે.

નાના કેવી રીતે થાવું,
આવો બાપુ ! રીત બતાવું,
ટીંકા, પાટુ, પીવું, ખાવું,
⁠પાડા થઈને રે – નાના...

શેરી વચ્ચે નાચવા આવો,
ઓળકોળાંબે હીંચવા આવો,
બોથડ મોટી મૂછ બોડાવો
⁠પૈસો દૈને રે– નાના...

સૂરજ ભૈની નાનકી છોડી,
કૂરડિયે કંકુડાં ઘોળી,
દા'ડી દા'ડી આવે દોડી
⁠દરિયે થૈને રે – નાના...

ડુંગર ઉપર જઈ બોલાવો,
ઉષા બેની, આવો આવો !
એની પાસે ગાલ રંગાવો
⁠ગોઠ્યણ થૈને રે – નાના...

નાને માથે નાનકડી પાંથી,
દૈશ હું ઓળી મીંડલાં ગૂંથી,
જોજો રાતે નાખતા ચૂંથી
⁠ગાંડા થૈને રે – નાના...

ઝભ્ભે ઝાઝાં રાખજો ખીસાં,
માંહી પાંચીકા વીણશું લીસા,
કાગળ, બાગળ, રૂપિયા પૈસા
⁠ફેંકી દૈને રે – નાના...

ખેંચી દોરી ખૂબ હીંડોળે,
થાકેલી બા જાશે ઝોલે,
ભાગી જાશું બેઉ ભાગોળે
⁠સાંકળ દૈને રે – નાના...

વેળુ વચ્ચે વીરડા ગાળી,
વાંકે ઘૂંટણ પીશું પાણી,
ગોવાળ આવે ગાડર જાણી
⁠ડાંગો લૈને રે – નાના...

લીંબોળીનાં લૂમખાં લેવા,
ઝૂંમશું ઝાડે વાંદર જેવા,
પંખીડલાંના ખાશું મેવા
⁠જંગલ જૈને રે – નાના...

ખેતર કોતર ખીણ ઓળંગી,
જોઈ વાદળીઓ રંગબેરંગી,
ઘૂમશું ડુંગર જંગી જંગી
⁠ઘેલાં થૈને રે – નાના...

નાની આંખે નાનકાં આંસુ,
બાની સાથે રોજ રિસાશું,
ખાંતે એના ધબ્બા ખાશું,
ગોળે જૈને રે.
નાના થૈને, નાના થૈને, નાના થૈને રે !