બાળ કાવ્ય સંપદા/મારું બેન્ડ
Jump to navigation
Jump to search
મારું બૅન્ડ
લેખક : ચંદ્રકાન્ત શેઠ
(1938-2024)
આ છે મારું બૅન્ડ,
એમાં બધાય ફ્રૅન્ડ !
પહેલાં મારા હાથીભાઈ,
પડઘમ ગજાવતા;
બીજા મારા બકરાભાઈ,
બ્યૂગલ બજાવતા;
ત્રીજા મારા તેતરભાઈ,
ખંજરી ખણકાવતા;
ચોથા મારા ઊંટભાઈ,
પિપૂડી વગાડતા;
પાંચમા તે પાડાભાઈ,
ઢોલક ઢમકાવતા;
છઠ્ઠા મારા ઘોડાભાઈ,
તબડક તાલ પુરાવતા;
સાતમા તે સસ્સાભાઈ,
સરગમ સૂર ચગાવતા,
આઠમા તે ઉંદરભાઈ,
ચૂં ચૂં તાંત ચલાવતા;
નવમા મારા મોરભાઈ,
થે...ઈ. થે..ઈ નચાવતા;
દસમા ચાલે દેડકભાઈ,
ત્રાંસાને ત્રમકાવતા.
એક ભાઈ અગિયારે આવે,
બીજો બારમે છેલ્લો;
આ ગીત મારું ગાય-સાંભળે,
નામ એમનાં મેલો.
બાર ભાઈનું આવું બૅન્ડ,
જે બોલાવે તેનું ફ્રૅન્ડ !