મંગલમ્/અમ્મારા અમ્મારા બાપુજી

અમ્મારા અમ્મારા બાપુજી

અમ્મારા અમ્મારા બાપુજી અમ્મારા રે,
અમ્મારા અમ્મારા ગાંધીજી અમ્મારા રે.
જ્યાં જાય ત્યાં એની જનમભૂમિ,

⁠સૌએ સગાં પ્રાણ પ્યારા.

— બાપુજી.

દરિયા રે દેવને સૌ દેશ સરખા,

⁠દ્વીપ દ્વીપ એના કિનારા.

— બાપુજી.

સૂરજદેવ એ તો વિશ્વ પ્રવાસી,

⁠સગાં છે નવલખ તારા.

— બાપુજી.

આવો હૂંફાળા મારા બાપુને ખોળલે,

⁠આવો જે દીન દુઃખિયારા.

— બાપુજી.

આવો બાપુજીનું સૈન્ય ઉભરાવો,

⁠સતના જે હોય જોરવાળા.

— બાપુજી.

એકલા જાય એ, આપણે શું પાંગળા?

⁠ચાલો ચાલો ચેતનવાળા.

— બાપુજી.

— જુગતરામ દવે