રામચન્દ્ર પટેલની કવિતા/આંગણે

આંગણે...

કે આંગણે કાગડો બોલ્યો,
મૂઈ મીં તો ઓરડો ખોલ્યો.

આ પા દોડું ને પેલીપા નાચું
મેડી ચઢીને જોઉં આઘે;
વગડો લાગે લીલોકુંજાર બાઈ!
સારસનો ટૌકો આવી વાગે,
–દરિયો દર્પણમાં ડોલ્યો... કે આંગણે

પ્હેરી ઓઢીને બારણે ઊભી
કુંભીની ઊજળી સાખ;
લીંપણમાં મોરપેંછાંના ઝગારા
ચૂલામાં ઊડે રે રાખ,
–પીઠીમાં જવારો ઝબોળ્યો... કે આંગણે

તાસકમાં ફૂલ-ધરો લીધાં
ચોખા ચપટી ભાર;
ટોડલે ટાંક્યાં આંબાનાં પાન
લાપસીમાં ઘી-ની ધાર,
–કંકાવટીમાં અંગૂઠો ડબોળ્યો... કે આંગણે