કાવ્ય-આચમન શ્રેણી – વેણીભાઈ પુરોહિત/૯. તેડાં

૯. તેડાં

મોરલાનાં નોતરાં આવ્યાં
ઓ મેઘરાજ!
વર્ષાને મોકલો.

આઠ-આઠ માસ રહી આભના પિયરમાં,
સાસરિયાં સામું નથી જોયુંઃ
હોંસભરી વાદળીઓ હીંચતી હુલાસમાં,
ઘૂમે છે વીજ વ્હાલસોયુંઃ
ઓ મેઘરાજ! વર્ષાને મોકલો.

વનની વનરાઈ ઓલ્યા વાદળિયા દેશમાં
નજરૂં નાખીને કાંઈ જોતીઃ
ઝરણાંએ ગીત ખોયાં ડુંગરની કંદરે,
થાકી એને હું ગોતીગોતીઃ
ઓ મેઘરાજ! વર્ષાને મોકલો.

વાયુને હૈયે સૂર હલકે મલ્હારના,
ઘનઘન પથરાય વીજજ્યોતિઃ
સાસરને વાટ એને વ્હાલથી વળાવજો,
જગવગડે વેરશે એ મોતીઃ
ઓ મેઘરાજ! વર્ષાને મોકલો.
ધરણીનાં નોતરાં આવ્યાં

ઓ મેઘરાજ!
વર્ષાને મોકલો.
(સિંજારવ, પૃ. ૬૪)