કાવ્ય-આચમન શ્રેણી – સુરેશ દલાલ/નિકટ નહીં ઘનશ્યામ

૧૩. નિકટ નહીં ઘનશ્યામ

આ દિવસ ઢળ્યો ને સાંજ પડી ને રાત થઈ સૂમસામ;
પળપળની આ વાટ વિકટ કે નિકટ નહીં ઘનશ્યામ!

⁠આ કદમ્બ ઊભા રહી શકે :
⁠આ જમુનાજલ તો વહી શકે.
આ ખાલી ગાગર ઝૂરે : કાંઠા ઊભા રહ્યા નિષ્કામ :
પળપળની આ વાટ વિકટ કે નિકટ નહીં ઘનશ્યામ!

⁠અંધકારને અંગે ઓઢી.
⁠ફૂલ-પાનની પાંપણ પોઢી.
પણ આ નયણાં નીંદવિહોણાં રટે પિયા તવ નામ;
પળપળની આ વાટ વિકટ કે નિકટ નહીં ઘનશ્યામ!

૧૯૬૪⁠(કાવ્યસૃષ્ટિ, પૃ. ૫૫)