ગુજરાતી નારીસંપદા : કવિતા/ઉત્તર ના મળે

ઉત્તર ના મળે

અંજના ગોસ્વામી ‘અંજુમ આનંદ’

⯐

પ્રશ્નનો જો કોઈ ઉત્તર ના મળે, અઘરું પડે,
ને અધૂરી ઇચ્છા જ્યારે ના ફળે, અઘરું પડે.

આપણે જે કંઈ બધું ભૂલીને બેઠાં હોઈએ,
તે જ પાછું આપણી બાજુ વળે, અઘરું પડે.

હોય લાખો દુ:ખ છતાં પણ રાખો મુખ હસતું સદા,
કૈંક જખ્મો અંદરોઅંદર કળે, અઘરું પડે.

સો વિરોધીઓની સામે હું લડત આપી શકું,
પણ કોઈ અંગત જો એમાં જઈ ભળે, અઘરું પડે.

મેં જ સામેથી બધા સંબંધ તોડ્યા છે છતાં,
રોજ એની યાદમાં હૈયું બળે, અઘરું પડે.

***