તારાપણાના શહેરમાં/રેખા

રેખા

ભૂંસાઈ સમજણની રેખા
સમજાવો કારણની રેખા

મૃગજળ અમને ઓછું પડશે
કોઈ વધારો રણની રેખા

શૈશવ આવી સાદ ન પાડે
થરથરશે ઘડપણની રેખા

ટપકાં... ટપકાં... ટપકાં… ટપકાં
બનતી ગઈ કણકણની રેખા

મર્યાદા જો છૂટવા મથશે
શું કરશે લક્ષ્મણની રેખા?

હું તો મનગમતું જોવાનો
છો ને રહી દર્પણની રેખા

ક્ષિતિજ ટુકડે ટુકડા થઈ ગઈ
તૂટી ગઈ પાંપણની રેખા

કોણ ‘ફના’ સંબંધ તપાસે
વેગળી છે હર ક્ષણની રેખા