નયન હ. દેસાઈની કાવ્યસંપદા/હોટલબૉયનું ગીત

હોટલબૉયનું ગીત

એક પાછી રકાબી ફૂટી—
શેઠીઆના રોજરોજ કંકાસે ત્રાસીને
⁠પાંચ સાત નોકરી છૂટી;
ડોલમાં હું ધબ્બ કરી બોળું છું હાથ અને
⁠યાદ આવે છે ગામનું તળાવ;
કાચના પિયાલામાં સીમ ઊઠે ખખડી
⁠એવો બને છે બનાવ;
બાદશાહી દેશી ને ફળફળતી બાફમાં
⁠મહેકે છે મંજરી જૂઠી—

આયનામાં કાચ નથી હોતો ને હોય છે
⁠શેઠીઆની આંખનો પહેરો;
ભીના કકડાથી હું સાફ કરું ટેબલ ને
⁠યાદ આવે માવડીનો ચહેરો—
હોટલના બાંકડા પર ઝૂકે ગગન
⁠એવી મને કોઈ આપો જડીબૂટી—
એક પાછી રકાબી ફૂટી—