યાત્રા/ચલી આવે

ચલી આવે

ચલી આવે, ચલી આવે,
⁠સપનાંની સુરખી સમી.
⁠ફુલડાંની સુરભિ સમી.

આવે આવે એની કુંકુમપગલી,
શ્વાસે શ્વાસે એને ફોરમઢગલી,
ગુંજી કુંજી ઊઠે કુંજગલી મોરી,

⁠રાધાના તલસન સમી.
⁠ચલી આવે, ચલી આવે.

વાટે વાટે એની પરબો હું ભાળું,
ઘાટે ઘાટે એની નૌકા નિહાળું,
શિખરે શિખરે એની ધજાઓ લહરતી,

⁠આશાના ઈજન સમી.
⁠ચલી આવે. ચલી આવે.

અંગે અંગે એની શાતા સમાધિ દે,
નાડી નાડી એના ધબકારા ધરબી દે,
રોમે રોમે એની રટણા વિચરતી,

⁠રંભાના નરતન સમી.
⁠ચલી આવે, ચલી આવે.


માર્ચ, ૧૯૪૩