અથવા અને/ચાકડે ફરતી માટીના લિસોટા...

ચાકડે ફરતી માટીના લિસોટા...

ગુલામમોહમ્મદ શેખ

ચાકડે ફરતી માટીના લિસોટા
સ્પષ્ટ, ગોળગોળ, રેશમી અને તગતગતા:
એવું સ્વચ્છ તમારું મોં.
ડામરના રસ્તે વરસેલા પાણીમાં
હવાનો આછો ફરફરાટ:
બસ એવી જ આંખો.

મોડી રાતે વાંસના લળી રહેલા ઝુંડને
ઝૂલવી રહેલા પ્રકાશનાં આંગળાં
જેવી અધઊઘડી મોંફાડ.

બપોરના સૂરજ જેવી અસ્વસ્થતા.

પણ સંકેલીને ખૂણે નાખી દીધેલ
અંધકારને ખોળે સંતાઈ રહેલો
આ વીંછીનો કાળોતરો કાંટો
જુઓ જુઓ
તમારા જ વાળમાંથી નીકળ્યો!

નવેમ્બર, ૧૯૬૨
અથવા