ગાતાં ઝરણાં/નકામાં નયનો

સરિતાને

નકામાં નયનો

              રે, આ નયનો કામ ન આવ્યાં!
બે દીવડાએ નિત્ય પ્રકાશી અંધારાં સર્જાવ્યાં!
              રે, આ નયનો કામ ન આવ્યાં!

રંગ જગતના માણ્યા કિન્તુ રંગ ન પૂરી જાણ્યો,
ઝાકઝમાળે અંજાઈને સાથ મને પણ તાણ્યો;
આગળ રહીને ઊંધા પાટા જીવતરને બંધાવ્યા!
                રે, આ નયનો કામ ન આવ્યાં!

ચેતન સાથે વાત કરી પણ જડને ન આપી વાચા,
જોઈ પરિચિત વાટ પરન્તુ, પંથ ન ચીંધ્યા સાચા,
  ઊંડે જઈને તેજ-તિમિરના ભેદ નહીં સમજાવ્યા,
                  રે, આ નયનો કામ ન આવ્યાં!

જોયાં દૂરનાં અજવાળાં પણ, અંતર-જ્યોત ન જોઈ
       ઉંબર-ઉંબર ભટકીને પણ ધામ ન દીઠું કોઈ
       ભિક્ષુક થઈને દૃષ્ટિરૂપે હાથ બધે લંબાવ્યા!
                   રે, આ નયનો કામ ન આવ્યાં!

૧૩-૭-૧૯૫૩