વિનોદ જોશીનાં કાવ્યો/સંકેલી લેશું ચોપાટને: Difference between revisions
Jump to navigation
Jump to search
સંકેલી લેશું ચોપાટને
(+1) |
(No difference)
|
Latest revision as of 00:25, 21 February 2024
હવે સમજ્યાં આ સોગઠાંની જાતને,
સખી! અમે સંકેલી લેશું ચોપાટને...
કેટલીયે રાત કરી કાળી
ને કેટલાં પરોઢ ભરી અંધારાં ધોયાં,
માંડેલા દાંવ અમે માંડ્યાં’તા માંડ
પછી પગડે બેઠાં ને તોય રોયાં;
હવે પડતી મેલીશું પંચાતને,
સખી! અમે સંકેલી લેશું ચોપાટને...
આંસુ હાર્યાં ને પછી હાર્યાં અણસાર
એક કળતર જિતાઈ ગયું કાળું,
આંખો તો સૂનમૂન સપનાની ઓરડી
ને ઉપર ઉજાગરાનું તાળું;
હવે જીરવશું જીવતરની ઘાતને,
સખી! અમે સંકેલી લેશું ચોપાટને...