સિગ્નેચર પોયમ્સ/પગલાં કુમકુમ ઝરતાં – રાજેન્દ્ર શુક્લ: Difference between revisions

From Ekatra Wiki
Jump to navigation Jump to search
(+1)
 
(No difference)

Latest revision as of 01:55, 21 April 2024

પગલાં કુમકુમ ઝરતાં

રાજેન્દ્ર શુક્લ


દૂર દૂર પરહરતાં સાજન
વરસો આમ જ સરતાં, સાજન.
કારતકના કોડીલા દિવસો–
ઊગી આથમી ખરતા, સાજન!
માગશરના માઝમ મ્હેલોમાં
નેવાં ઝરમર ઝરતાં, સાજન.
પોષ શિશિરની રજાઈ ઓઢી
અમે એક થરથરતા, સાજન!
માઘવધાવ્યા પંચમ સ્વર તો
કાન વિશે કરકરતા, સાજન!
છાકભર્યા ફાગણના દ્‌હાડા–
હોશ અમારા હરતા, સાજન!
ચૈત્ર ચાંદની, લ્હાય બળે છે,
તમે જ ચંદન ધરતા, સાજન!
એ વૈશાખી ગોરજવેળા,
ફરીફરીને સ્મરતા, સાજન!
જેઠ મહિને વટપૂજન વ્રત,
લોક જાગરણ કરતા, સાજન!
આષાઢી અંધારે મનમાં
વીજ સમાં તરવરતાં, સાજન.
શ્રાવણનાં સરવરની પાળે,
હવે એકલા ફરતા, સાજન!
ભાદરવો ભરપૂર વહે છે,
કાગ નિસાસા ભરતા, સાજન!
આસોનાં આંગણ સંભારે
પગલાં કુમકુમ ઝરતાં, સાજન!