મંગલમ્/માછીડા, હોડી તું

માછીડા, હોડી તું

માછીડા, હોડી તું હંકાર
⁠મારે જાવું પેલે પાર. (૨)

જમણે કાંઠે મથુરા નગરી
⁠ડાબે ગોકુલ ગામ,
આ આરે મારી દેહ ઊભી છે
ત્યાં છે આતમરામ;
⁠મારે જાવું પેલે ધામ… માછીડા૦

આભનો સાગર ઝળહળ ભરિયો
⁠માંહી સૂરજ ને સોમ
આ આરે ધરતીની ભેખડ
ત્યાં છે ચેતન ભોમ;
⁠મારે જાવું ત્યાં હરિ ૐ… માછીડા૦

હલકી હેલે આયુષ ઊછળે
⁠જગના વાય સમીર,
આ આરે મારી આશાની નિકુંજો,
ત્યાં છે પ્રેમમંદિર;
⁠મારે જાવું પેલે તીર… માછીડા૦