મંગલમ્/મારા બાપુની ડેલીએ

મારા બાપુની ડેલીએ

મારા બાપુની ડેલીએ જઈ,
⁠ગરબે ઘૂમશું તાળી દઈ.
બ્રાહ્મણ સવારમાં મોદકના તાનમાં,
⁠શેરીએ શેરીએ જઈ…
સ્વસ્તિ કલ્યાણ કરી, ઝોળીમાં ટપ દઈ,
⁠નાખશું પંચભાગ લઈ…મારા૦

વેપારી વાણિયો, મામો ને ભાણિયો,
⁠બેસે બજારે જઈ…
બોલમાં મારે, તોલમાં મારે,
⁠ડાહી ડાહી વાતો કહી…મારા૦

વેજાં વેતરીએ ને ચોળિયું સીવીએ,
⁠ગામનાં લૂગડાં લઈ…
કાતરથી કચ કચ, કાપીએ ખચ ખચ,
⁠એમ કરી ડગલી થઈ…મારા૦

ગોવાળ ગામનો ગાયો ચરાવતો,
⁠તળાવની પાળે જઈ…
ઢોર હંકારતો ને ગીતો લલકારતો,
⁠ખાઈને છાશ ને દહીં…મારા૦