મંગલમ્/પતંગિયાં રૂપાળાં

પતંગિયાં રૂપાળાં

પતંગિયાં રૂપાળાં
અમે પતંગિયાં રૂપાળાં
⁠પચરંગી પાંખોવાળાં…અમે૦

અમે ફૂલ ફૂલ પર મોહ્યાં,
અમે અમી અંતરો ખોલ્યાં,
⁠એમાં ભાન અમારાં ખોયાં…અમે૦

પેલાં કરણ ચંપો બોલાવે,
એનાં દિલનાં દ્વાર ખોલાવે,
⁠એના હૈયે અમને ઝુલાવે…અમે૦

પેલો પવન નાચતો આવે,
એ તો બંસી કેવો બજાવે,
⁠ફૂલ સંગે અમને ઝુલાવે…અમે૦

અમે ફૂલડાંનાં ગીત ગાયાં,
એણે કેવાં અમીરસ પાયાં,
⁠એની કેમ ભુલાશે માયા…અમે૦