બાળ કાવ્ય સંપદા/કેવી મજા ! (૩)

કેવી મજા !

લેખક : સોમાભાઈ ભાવસાર
(1911-1984)

સૂરજ જેમ પ્રકાશ મળે જો,
દૂર દેશથી આવી પૂગી,
આભ પરે હાં સાચે ઊગી,
પ્રકાશવાની કેવી મજા !

કોયલની જેમ કંઠ મળે જો,
વનવગડે ને કુંજે કુંજે,
આંબા ડાળે બેસી ઊંચે,
ટહુકવાની કેવી મજા !

ફૂલની જેમ સુવાસ મળે જો,
છોડ છોડવા ઉપર ખીલી,
ચંદ્રકલાને અંગે ઝીલી,
ફોરવાની કેવી મજા !

વાદળીની જેમ ગતિ મળે જો,
આમ તેમ દોડી ગગડાટે,
વીજ તણા ચમકારા સાથે,
વરસવાની કેવી મજા !