ધ્વનિ/ભૂલ ભાંગી મારી ભૂલ હો ભાંગી

૧૪. ભૂલ ભાંગી મારી ભૂલ હો ભાંગી

⁠ભૂલ ભાંગી મારી ભૂલ હો ભાંગી
માઝમ રાતનું સોણલું સર્યું, કિરણને કર આંખ હો જાગી. -ભૂલ.

⁠રંગ ને રૂપે રમતી તરલ
⁠નીરખી’તી કૈં છાયા,
⁠આવતી મારે હાથ ના તો યે
⁠પ્રાણમાં પ્રગટી માયા,
તરસ્યું હરણ દૂરનાં પેલાં, ઝાંઝવાંને નીર જેમ હો રાગી. -ભૂલ.

⁠ઝંખનાથી યે પામતાં ઝાઝૂં
⁠ધન્ય હું બડભાગી,
⁠અવ ન શિશિર-દાહ, ધરાને
⁠મલયની લ્હેર લાગી,
સુષુમણાની મોરલી મારી મોહન સૂરને લય હો વાગી. -ભૂલ.
૬-૧૨-૪૩