સાહિત્ય પલ્લવ – ભાગ ૨/હરિગુણ ગાય તે

હરિગુણ ગાય તે

બાપુ ગાયકવાડ

હરિગુણ ગાય તેને હરિ જેવા જાણો,
સમજ્યા વિના તે મત શીદ તાણો;
⁠તાણો, કે હરિને જાણો. હરિ૦
જે કરે લાગા તેથી વહાલો ગયા આઘા,
સૂધું સમજ્યા નહિ તો બળ્યા એના વાઘા,
આત્મા ચીને નહિ તો મૂઆ ઢાંક્યા ને નાગા, ⁠
એના મનના સંશય નથી ભાગ્યા;
હરિનું નામ મૂકીને જો લે પહાણો,
⁠પહાણો કે તેને જાણો. હરિ૦
હરિને પાષાણ કહે તે જ ગાંડો,
એ તો સદા અખંડ છે ને ના થાય ખાંડો,
તમે સમજીને પગલાં માંડો.
⁠હરિને જડ કહે તે જડ,
⁠ત્યાં તો થઈ છે વઢાવઢ,
⁠ત્યાં થઈ છે ભડાભડ;
⁠જેણે શોધ્યું નહિ થડ,
⁠તેને ખર્ચો કાયાગઢ.
સમજણ દીવો કર્યો રાણો,
⁠રાણો, કે હરિને જાણો. હરિ૦
હરિ કે હુકમ બિન પત્ર નહિં હાલે,
રૂડો ખેલ બનાવ્યો મારે વહાલે,
હરિજન તો મગ્ન થઈ મહાલે.
⁠એને નેત્ર નહિ કરણ,
⁠એને ભુજા નહિ ચરણ,
⁠એને એકું નહિ વરણ,
⁠એને આવે નહિ મરણ,
⁠હરિ વસ્તુ તારણતરણ.
સાચી વાત કહું છું તેને છાણો.
⁠છાણો, કે તેને જાણો. હરિ૦
બાપુ સત નામ સમજે તે તો શાણો,
⁠શાણો, કે તેને જાણો. હરિ૰

સ્વાધ્યાય

૧. હરિ કોનાથી આઘા રહે છે?
૨. મૂર્તિપૂજા વિરુદ્ધ બાપુને શું કહેવું છે?