ભરત વિંઝુડાની ગઝલસંપદા/નખરાળી ગઝલ

૧૨
નખરાળી ગઝલ

લીલી પીળી લાલ પેનમાં કાળી કાળી ગઝલ
એક કુંડલા ગામ અને કલકત્તાવાળી ગઝલ

અરધું અંગ અને તે ડાબું પત્ની જેવું મળ્યું
જ્યાં લગ કોઈ કોઈ દિન આવે છે સાળી ગઝલ

કોઈ હાથ હથેળી ઉપર થપ્પડ મારે નહીં
તમને સંભળાઈ તે છે એક હાથની તાળી ગઝલ

હબસીના નહીં જન્મેલા બાળકનું પહેલું રુદન
હોઈ શકે છે કોઈ દિવસ એક શક્તિશાળી ગઝલ

વિખેરાઈને શબ્દકોશમાં છુપાઈ ગઈ છે ‘કંવલ’
પાને-પાને શોધું છું હું એ નખરાળી ગઝલ

(પંખીઓ જેવી તરજ)