હેમંત ધોરડાનાં ચૂંટેલાં કાવ્યો/ચારે તરફથી એમ નજરને સમેટશું

ચારે તરફથી એમ નજર પાછી ખેંચશું
ના હોય ત્યાં ય એનો કમરબંધ દેખશું

સૂંઘીશું ગાઢ શ્વાસ ભરી એના કેશને
વેણીની જેમ આપણે પણ બહુ મહેકશું

નિખરે છે એના ગૌર વરણથી બધા ય રંગ
એની ગલીમાં મેઘધનુ પર ટહેલશું

લંબાવી હાથ સ્પર્શશું વાદળની કોરને
પાલવ કિનાર સાથ ક્ષિતિજ લગ લહેરશું

છે મૌન એનું પૈઠણી વાણી ય પૈઠણી
શું તાણાવાણા આપણે એના ઉકેલશું

છંદવિધાન
ગાગાલ ગાલગાલ લગાગાલ ગાલગા