અર્વાચીન ગુજરાતી કાવ્યસંપદા/રાવજી પટેલ/વરસાદી રાતે

Revision as of 06:53, 15 July 2021 by MeghaBhavsar (talk | contribs) (Created page with "{{SetTitle}} {{Heading|વરસાદી રાતે|રાવજી પટેલ}} <poem> ઈશાની પવન મારા છાપરાના નળિયાન...")
(diff) ← Older revision | Latest revision (diff) | Newer revision → (diff)


વરસાદી રાતે

રાવજી પટેલ

ઈશાની પવન મારા છાપરાના નળિયાને ઊંચું-નીચું કર્યા કરે.
નળિયાંની નીચે મારી ઊંઘ પણ પીંછાં જેવી
આઘીપાછી થયા કરે.
નાનો ભાઈ બચ બચ ધાવે,
બચકારે બચકારે અંધારાનો મોલ હલે.
સ્હેજ વળી ફણગાની જેમ કૂંણું કણસીને
બચ બચ પીધા કરે માયાળુ ખેતર.
મારી કીકીઓમાં કણસલાં હળુ હળુ હલ્યા કરે.
એની પર પંખીઓનાં પીંછાં સ્હેજ ફરફરે.
આખો દહડો ઢેફાઈ કુટાઈ —
મા
પંજેઠીની જેમ લૂસ ખાટલામાં પડી રહી.
મારા બાવડામાં દિવસ, બળદ, હળ; બારે મેઘ પોઢ્યાં
અને
નળિયાંની નીચે મારી ઊંઘ
પીંછાં જેવી આઘીપાછી થયા કરે…
(અંગત, પૃ. ૩૨)