અર્વાચીન ગુજરાતી કાવ્યસંપદા/ભરત ત્રિવેદી/— (આંખને દર્પણ નડે...)
Revision as of 08:31, 19 July 2021 by MeghaBhavsar (talk | contribs) (Created page with "{{SetTitle}} {{Heading|— (આંખને દર્પણ નડે...)|ભરત ત્રિવેદી}} <poem> આંખને દર્પણ નડે તો આપ...")
— (આંખને દર્પણ નડે...)
ભરત ત્રિવેદી
આંખને દર્પણ નડે તો આપવી કોને સજા?
તે પછી દેતાં ખુલાસા બાંધવી મોટી ધજા?
એ ખરું કે વાત વધતાં આટલી તો ના વધે,
એ ગલીમાં બોર ચાખ્યાં — ચાખવાની લો મજા.
આમ તો હું પ્હાડને ડગ એકમાં માપી લઉં,
ઉંબરો ઓળંગવાની તો મને છે ને રજા?
આપ આવો કે ન આવો શેરીઓને શી તમા,
ડોક તાણીને ઊભી એ બારીઓને દો સજા?
લોહીનો ટશિયો ફૂટે ને સૌ ઇલાજો બેઅસર,
શબ્દ સાથેની રમતમાં ભોગવી છે આ ઈજા?