સોરઠી સંતવાણી/જુક્તિની જાણ

જુક્તિની જાણ

જુગતી તમે જાણી લેજો, પાનબાઈ!
મેળવો વચનનો એક તાર,
વચન રૂપી દોરમાં સુરતાને બાંધો,
ત્યારે મટી જશે જમનો માર —
ભાઈ રે! જુગતી જાણ્યા વિના ભગતી નૈ શોભે,
મરજાદ લોપાઈ ભલે જાય.
ધરમ અનાદિનો જુગતીથી ખેલો
જુગતીથી અલખ તો જણાય. — જુગતી.
ભાઈ રે! જુગતીથી સેજે ગુરુપદ જડે, પાનબાઈ!
જુગતીથી તાર જોને બંધાય,
જુગતીથી ત્રણ ગુણ નડે નહીં
જુગતી જાણે તો પાર પોંચી જાય. — જુગતી.
ભાઈ રે! જુગતી જાણી તેને અટકાવનાર નવ મળે,
તે તો હરિ જેવા બની રે’ સદા;
ગંગા રે સતી એમ બોલિયાં રે
તેને તો નમે જગતમાં બધા. — જુગતી.