કાવ્યમંગલા/દશા ભાગ્યની

From Ekatra Wiki
Revision as of 11:24, 15 September 2022 by MeghaBhavsar (talk | contribs) (Created page with "{{SetTitle}} {{Heading|દશા ભાગ્યની|}} <poem> <center>(પૃથ્વી)</center> તહીં અલગ હા, રહો જ, નજદીક ના આવશો, ચહું ન તમ સ્પર્શ, ના અધરપાન, એવો કશો નથી લખલખાટ, દર્શન ઘણું ય મારે અને અદર્શન થશે જ તો ય નહિ દુઃખ તેનું મને. ત...")
(diff) ← Older revision | Latest revision (diff) | Newer revision → (diff)
Jump to navigation Jump to search
દશા ભાગ્યની
(પૃથ્વી)


તહીં અલગ હા, રહો જ, નજદીક ના આવશો,
ચહું ન તમ સ્પર્શ, ના અધરપાન, એવો કશો
નથી લખલખાટ, દર્શન ઘણું ય મારે અને
અદર્શન થશે જ તો ય નહિ દુઃખ તેનું મને.

તમે કુસુમકોમળાં, કમલનેત્ર, સ્ત્રષ્ટાતણી
રચેલ મધુમૂર્તિ શાં, નયન જ્યાં ઠરે આફુડાં,
પરાગભર પુષ્પ શાં જગ ભરો સુવાસે રુડાં,
હશો પ્રિયતમા વસ્યાં હૃદય કોઈને, કામિની !

તમે પ્રિયતમા હરેક પ્રભુસૃષ્ટ સૌંદર્યના
પ્રપૂજકતણી ઉપાસ્ય, સ્મરણીય, શિરમોર છો,
શુચિત્વ તમ દેહતાજપ-કુમાશ પે ઓરછો
પડે મલિનતા અને વિષયનો, મને સહ્ય ના.

અખંડ ટકજો તમે સુરભિવંત સૌભાગિની,
અને અલગ હું ભમીશ સ્મરતો દશા ભાગ્યની.

(૨ માર્ચ, ૧૯૩૩)