ઉદયન ઠક્કરનાં ઉત્તમ કાવ્યો/ત્રિપદી

ત્રિપદી

વાહ રે! વરસાદનું ટીપું પડ્યું
લાગલું, મારી હથેળીને અડ્યું
હસ્તધૂનન થઈ ગયું, આકાશથી!
૦

‘કેમ પ્યારે, ઘાસ કેવું હોય છે?
તીતીઘોડાને પૂછ્યું, તો એ કહે,
કે દીવાને-ખાસ જેવું હોય છે!
૦

ચંદ્રલેખાને કરી લે હસ્તગત,
એટલી તો હોય કોની હેસિયત?
તે છતાં ચમક્યાં કરે, ખાબોચિયું
૦

એક વાતે વાયરો મુંઝાય છે
જેનાં જેનાં રંગ ને રોનક વધે
મ્હેક એની કેમ ઓછી થાય છે?
૦

ફૂંક મારી ત્યાં કશું જાદુ થયું!
આ તરફ એક દીવડી બુઝાઈ ગઈ
તે તરફ આકાશ, ઝળહળતું થયું