ગુજરાતી નારીસંપદા : કવિતા/શરદની રાત

શરદની રાત

પુષ્પાબહેન વકીલ

⯐

રૂડી શરદ પૂનમની રાત આજ,
મને રાસ રમ્યાંના કોડ રાજ,
પ્રેમે પધારો મારે આંગણે.
મેં તોરણ બંધાવ્યા ટોડલે આજ,
મેં દીવડા મૂકાવ્યા ગોખ રાજ,
પ્રેમે પધારો મારે આંગણે.
ગાજે તાલ પખાજ ને ઝાંઝરી રે,
વાયે વીણા મૃદંગ ને વાંસળી રે,
પ્રેમે પધારો મારે આંગણે.
ખીલી સોળકળાથી ચાંદની આજ,
તેણે મોહ્યું છે મારું મન રાજ,
પ્રેમે પધારો મારે આંગણે.
હેત હૈયે હુલાવી આપણે આજ,
પ્રેમે રંગભર રમશું રાસ રાજ,
પ્રેમે પધારો મારે આંગણે.

***