ગુજરાતી નારીસંપદા : કવિતા/ઇતિહાસ

ઇતિહાસ

નીતા રામૈયા

⯐

તમે જે ઇતિહાસ લખ્યો
તે હતો અમારા નામ વિના પારવો
તમે જે ખડિયો લઈને બેઠા
તે હતો શાહી વિનાનો
તમે કલમને જોતરી બેઠા
અને થોથાં ઉપર થોથાં ઠાલવ્યાં
કથની તમારી ગાથા તમારી
ને તમારી જ મોટપ
તમે પૂરું પાનું બન્યા
ને અમે એક હાંસિયો પણ નહીં
અમે પાદપૂર્તિ કે નોંધમાંયે
ક્યાંય હાજર નહીં
અમે શાહી બનવા ગયા તો
તમે શાહીચૂસ થઈ બેઠા
તમે અમારા ધોરિયે દટ્ટો માર્યો
અમારી રગરગમાં
તમારો ઇતિહાસ ભર્યો છે
તે અમે લખી બેસીએ તો?

***