અનુનય/કેવું થાય!

કેવું થાય!

ઊભા થવાની આશામાં
યુગો સુધી આડા પડી રહીએ
ને અગસ્ત્ય તો આવે જ નહીં –
ત્યારે આપણને કેવું થાય!
હાથમાંની માછલી
જીવતી થઈને જલમાં રમે
ને ખાઈ ગયાનું આળ આવે –
ત્યારે આપણને કેવું થાય!
જાણીએ
કે પાછળ જોવાનું નથી
ને છતાં જોવાઈ જાય
આવનારું અલોપ થાય –
ત્યારે આપણને કેવું થાય!
ત્યારે
આપણે બચકું ભરવા જઈએ
પણ–
વેદનાનું હાડકું તો કઠ્ઠણ કઠ્ઠણ
એટલે
દાંતમાંથી નીકળતા લોહીને ચાટ્યા કરીએ –

૪-૯-’૭૪