બાળ કાવ્ય સંપદા/ગુલમહોર
Jump to navigation
Jump to search
ગુલમોર
લેખક : નટવર પટેલ
(1950)
ઘરના ખુલ્લા આંગણ મહોર્યો
કેવો આ ગુલમોર !
તડકો પીને કેવો ફોર્યો
પીળો આ ગુલમોર !
ધોમ ધખે છે ધરતી કણકણ
વ્યોમ થકી વરસે છે લૂ,
તરસ્યાં પંખી, જન સૌ તલસે
માગે કેવળ શીતળ ભૂ.
એવે રૂપ ધરીને મહોર્યો
ધીરો આ ગુલમોર !
ગુલમોરની ડાળે ડાળે
મહેંકે રાતાંપીળાં ફૂલ
ભરબપોરે લૂમાં ગાતો
થઈને એ મશગૂલ
વાસંતી હૈયામાં મહોર્યો
શીળો આ ગુલમોર !
તડકો પીને કેવો ફોર્યો
પીળો આ ગુલમોર !