બાળ કાવ્ય સંપદા/રમશું રમશું રેલમછેલ
Jump to navigation
Jump to search
રમશું રમશું રેલમછેલ
લેખક : હરિકૃષ્ણ પાઠક
(1938-2025)
રમશું રમશું રેલમછેલ,
હળશું મળશું કરશું ગેલ.
ભેળાં કરશું લગ્ગી-કોડા,
પગમાં નહિ ચંપલ; નહિ જોડા,
ટોળી ખરી ઉઘાડપગાની,
એમાં જોડી જગા-ભગાની.
બટકો બાબુ લંબુ ચમનો,
ખડખડ હસવું ખેલમખેલ,
રમશું રમશું રેલમછેલ.
ભલો શિયાળો, ટાઢ મજાની,
ભલો ઉનાળો, લૂય મજાની,
વરસાદે વાછંટ મજાની,
બારે માસ મજાની ગમ્મત;
ધિંગામસ્તી ઠેલમઢેલ,
રમશું રમશું રેલમછેલ.