શાંત કોલાહલ/મલય પવન
Jump to navigation
Jump to search
મલય પવન
મલયનો વનવનમાં ભમે વાયરો પેલો :
સઈ રે મોરી !
મારગે અંટેવાળ આવ્યો તે
અંગને લગીર લાગિયો હેલો...
અહીં કે તહીં અડક્યો એવી
અમથી રે અટકળ,
ક્યાંય રે એની રેખ નહિ ને
તોય ઝાઝી કળતર;
સઈ રે તમે
ફાગણને રત રંગને રેલો,
એકલડી મને અળગી મેલો...
મન મારું આ હાર ન માને
જોઉં છું રે અવસર,
લાગમાં આવી જાય ત્યાં લેવું
અદકેરું વળતર;
આગનો એને ભય નહિ
ફૂલમ્હેકથી ઢળી જાય રે ઘેલો...