અર્વાચીન ગુજરાતી કાવ્યસંપદા/પન્નાલાલ પટેલ/દરિયાવ, દાબી દે
Jump to navigation
Jump to search
દરિયાવ, દાબી દે
પન્નાલાલ પટેલ
દરિયાવ, દાબી દે અણિયાળી આંખો,
ઢાળી લે પોપચાંની પાંખો.
જીરવી નાં જાય –
ઝેરીલી જીરવી નાં જાય!
દરિયાવ, ઢાંકી લે છાતડિયે છેડો,
તાણી દે કાપડની કોહો,
ઝાલ્યો નાં જાય –
જીવડો ઝાલ્યો નાં જાય!
દરિયાવ, વે’તેરી નાં મેલ્ય વેણો,
આંટી દે અંબોડે ફેણો,
મનખો રોળાય –
મુજનો મનખો રોળાય!
દરિયાવ, રે’વા દે લચકાતો લે’કો,
મેલી દે મોરલાની ગે’કો,
કાળજડાં કોરાય –
કુમળાં કાળજડાં કોરાય!