કાવ્ય-આચમન શ્રેણી – સુરેશ દલાલ/રાત આખી

૨૬. રાત આખી

તેં તો રાત આખી વાંસળી વગાડ્યા કરી,
મને સૂતીને સપને જગાડ્યા કરી.

બાવરી આ આંખ મારી આમતેમ ઘૂમે
⁠ને ઝાંઝરથી લજ્જા વેરાય,
એકલીના મહેલમાં ઓશીકે જોઈ લો
⁠મધુવનના વાયુ લહેરાય.
હું તો બાહુના બંધમાં બંધાયા કરી.
તેં તો રાત આખી વાંસળી વગાડ્યા કરી.

નીલરંગી છાંય થઈ તારો આ સૂર
⁠મારી યમુનાના વ્હેણમાં દોડે;
જાગીને જોઉં તો જાણું નહિ કે કેમ
⁠મોરપિચ્છ મહેકે અંબોડે!
મને અનહદના રંગમાં ડુબાડ્યા કરી.
તેં તો રાત આખી વાંસળી વગાડ્યા કરી.

૧૯૬૯⁠(કાવ્યસૃષ્ટિ, પૃ. ૧૪૨)